Saturday, January 15, 2005

my first ever visayan letter

mga binati ko:

kumsuta na man mong tanan diha sa tagsa-tagsa ninyo nga mga kinabuhi? ako kanunay lang gihapon ang paghinaot nga anaa kamo sa himsog nga panlawas og malipayon nga kahimtang.

nagsugod na ang among mga seminars and trainings dire sa hayskul. bag-o lang gani mi nahuman sa theater and arts workshop. nindot kaayo siya nga kasinatian. nakakat-on ko og daghan nga kahibalo mahitungod sa pagtudlo. nakat-unan pud nako nga daghan man diay klase klase nga pitch sa boses og mamahimo man diay ta nga kataw-anan sa pagbuhat sa mga buluhaton nga wa nako handuma nga mahimo. sama sa pag-arte, pagsyagit, pagsayaw og pag inat sa akong nawong. maayo gani kay baga na ang akong nawong sa pagtudlo og wala kaayo ko maulawan.

ang sunod namo nga seminar mao ang gitawag nga ISEW o ignatian spirituality in education workshop. ikatulo na nako ni nga tuig sa pagtambong sa nahisgutan nga semianr apan hangtud karon wala lang gihapon ko kasabot sa iyang proseso. ayaw og saba. basta ang ako lang kalingawan mao ang kaon, socials, og ang lugar kay didto na pud mi mopuyo sa jesuit retreat house sa malaybalay.

bahin sa akong personal nga kahimtang. ako nagapamalandong sa karon kung unsay akong gusto mahitabo sa akong kinabuhi sunod tuig. kay sa way limod-limod nga pagkaingon, kasukaon na ko sa akong ginabuhat nga pagtudlo. maayo lang unta kung mga banggiitan tanan akong estudyante. makalingaw man usahay ang mga bata pero dili makabayad sa sakit sa dughan.hehehe. bitaw oy, gusto lang ko mahilayo niining siyudad kay sa akong paminaw dili na ako mao. nawala na si shal nga inyong nailhan. tinuod tong giingon nga kung unsa imong trabaho maoy maka-ingon kung unsa ka nga pagkatawo. strikta na kaayo ko og mora nag old maid. wala ko ganahi.

kung naa lang gayud akoy mahimo, gusto ko magbinukid og magpuyo uban sa mga simpleng tawo. wala pa gihapon na nawala kanako. daan pa tong una. unsaon ta man nga daghan man pud ta responsibilidad sa pamilya.ang ginoo na lang siguro ang makabalo.

sa akong gugma-kinabuhi pud...ang akong balita kaninyo mao ra gihapon sa miagi. buot pasabot walay kalahian. ambot lang sa atong ginoo nganong dili ko niya ginahatagan og uyab. hapit nako magmahay. gamay na lang.hehehe. kung muabot kog traynta nga wala gihapon mag pili na gyud ko kung single life ba o single life.hahaha!

mianhi si ika dre miaging dlaw kay nangita mi og puluy-anan nya. kung wala mo nasayod buot nya nga mag-eskwela og medisina sa xavier. naglibot libot mi sa siyudad sa dugay nga panahon, apan wala mi nakit-an.hahaha! nanan-aw na alng mi og matrix reloaded. maayo man sya nga salida apan klaro kaayo nga computer ang nagpalihok. wala gihapon ko kasabot sa iyang tibook nga istorya. makabugok siguro ning magmaestra no?

oi, naa diay koy balita nga bag-o! nalipay ko karon kay nangukay mi sa akong mama. og nakapalit ko og maanindot nga bedsheet. duha kabook sa presyo nga dos syentos singkwenta. maanindot gayud siya. ingon akong mama nga humulan pa daw niya og ariel daw ibulad daw butangan pag downy. kung maka anhi mo dire ipatulog ta mo sa akong inukay nga bedsheet.

lunes karon.. wala koy lingaw. pasensya na lang......... kung nanginahangalan mo og translation pasayloa ako kay wala gihapon ko kasabot.

hehe

tshals

1 comments:

sTaceY said...

really awesome! nalingaw jud ko ani! chuy kaau ka magbisaya maam! haha ipadayon ang imong gibati! haha

 
;